Acusado

... eles poden dicir o que queiran, descolgar os seus diplomas da parede, escanealos e adxuntalos aos seus míseros informes para lles dar credibilidade, pero non teñen nin idea, nin idea da cantidade de noites que baixei até á represa do muiño, rabuñando as pernas nas silvas e nos toxos, para lavar con aquela corrente xelada a vergonza da humillación, para que o frío e a auga aspirasen do fondo de min ese fedor denso a putrefacción. Calquera cousa antes que ceder ao sabor metálico da rabia que me comía, que me segue a comer, porque eles poden dicir o que queiran pero non saben nada...