Barco, visado, comisaría, vello

Afeito a cruzar a ría en barco, agora vou tentalo co Mediterráneo. Paguei unha fortuna polo billete, creo que con isto mercaba medio ferry, éche o que ten o ser estranxeiro. É que os avións estaban completos e o visado acábase esta semana, e como non quero líos coa policía, menos aquí, menos no ramadán que comeza mañá e que pon á xente fóra de si até á hora da última oración, cando os bandullos encollídos se poñen a rebentar. Iso, tento marchar como sexa, se non hai outro remedio irei incluso na sala de máquinas, antes que voltar á comisaría calquera cousa, non quero voltar, a primeira vez que fun e tivo que ser aquí, digo en Arxelia, até fago a circuncisión antes que voltar. Na miña xeración sempre houbo moito ódio á policia, eu nunca tiven tratos con eles, éranme indiferentes, mais agora que me tocou a min comprendo o porqué de tanta xenreira, basta que teñas unha mala experiencia de rapaz para quedar condicionado para toda a vida. A verdade é que o trato amábel que recibo en Barajas cando saio do avión de paso por Espanha faime pensar que moito melloraron, e como as cousas non mudan da noite para a mañá, tamén me fai pensar que xa vou vello.